Berria.info

Lewis Hamiltonek modu onean ekin dio Brasilgo Sari Nagusiari, gaurko FP2 saioan denborarik azkarrena markatu eta gero. Txapelketako bigarren postua jokoan dute hainbat gidarik, Hamiltonek tartean, eta guztiak oso antzeko denboran ibili dira Interlagos-eko zirkuitu laburrean. Sebastian Vettel izan da bigarrena, eta Mark Webber hirugarrena. Australiarra goizeko saioan izan da azkarrena, eta aurreko postuetan mantendu da ondorengoan. Lehen zortzi gidariak segundu erdian sartu dira.

Horixe baita Interlagosen berezitasunetako bat: denborak oso estuak izan ohi direla. Hori, eta asfaltuak dituen ondulazioak. Balaztatze guneak tortura jarraia dira auto eta gidarientzat, urtetik urtera errepikatu ohi den irudian. Autoaren gurpilak jauzi txikiak ematen ditu haien erruz eta horrek kontrola galtzeko arriskua handitzen du. Horrek hainbat pista irteera eta gurpil blokaia eragin ditu. Zorionez, larririk ez.

Sebastian Vettelek lasterketa laburra izan zuen Abu Dhabin, aspaldiko partez erretiratu beharra izan baitzuen. Horri buelta eman nahi diola adierazi du, eta urteko lorpen guztiak hor badaude ere, denboraldia garaipenarekin amaitu nahi du. Hori entzutea berri txarra da gainerako gidarientzat, baina gaur ikusitakoaren arabera, alde txikiak daude gidari gehienen artean. Jenson Button apalago aritu da bigarren saioan, zazpigarren amaituz, baina edozein kasutan bere taldekidearengandik 0,4 segundu baino gutxiagora amaitu du.

Brasilgoa azken lasterketa izan daiteke gidari bat baino gehiagorentzat, datorren urterako seguru ziruditen postu asko kolokan jarri baitira azkenaldian. Horien artean leudeke Rubens Barrichello (Williams), Pastor Maldonado (Williams), Jerome D'Ambrosio (Virgin), Vitantonio Liuzzi (HRT) eta Jaime Alguersuari (Toro Rosso). Maldonako Venezuelko PDVSA enpresaren babesa jaso du orain arte, baina enpresa publikoa izaki, parlamentuaren baimena behar du dirua emateko, eta badirudi guztiak ez daudela horrekin ados.

Alguersuarik, bestalde, ia seguru zirudien Toro Rosson eta 2013an Red Bullera jauzia emateko hautagai serioa zirudien, baina azken egunotan egoerak aldaketa jasan du, eta Jean Eric Vergne indartsu azaldu da koadroan. Daniel Ricciardok disdira galdu du HRT taldean, baina oraindik bere indarra dauka. Alguersuarik egunotan egin dituen adierazpenetan atzematen da ez duela datorren urterako ezer segururik, eta ia agur esaten zion Red Bullen egituran jarraitzeari.

Kirol arlora itzuliz, igandeko lasterketa euripean korri daitekeen aukerak gero eta handiagoak dira. Lehia ikusgarriak eskaini ditu Interlagosek azken urteetan, eta aurten titulu guztiak erabakita daudela badator ere, zirkuitua mundial guztiko onenetakoa da. Horrek ikuskizuna handituko du. Laburra da gainera, eta autoak berehala pilatuko dira bertan, auto mantsoen eragina handituz. Haiekin iaioa izan beharko du irabazle irten nahi duenak.

Pos  Driver                Team                   Time                Laps
 1.  Lewis Hamilton       McLaren-Mercedes       1m13.392s              35
 2.  Sebastian Vettel     Red Bull-Renault       1m13.559s  + 0.167	41
 3.  Mark Webber          Red Bull-Renault       1m13.587s  + 0.195	41
 4.  Fernando Alonso      Ferrari                1m13.598s  + 0.206	35
 5.  Michael Schumacher   Mercedes               1m13.723s  + 0.331	38
 6.  Felipe Massa         Ferrari                1m13.750s  + 0.358	39
 7.  Jenson Button        McLaren-Mercedes       1m13.787s  + 0.395	36
 8.  Nico Rosberg         Mercedes               1m13.872s  + 0.480	42
 9.  Adrian Sutil         Force India-Mercedes   1m14.144s  + 0.752	41
10.  Paul di Resta        Force India-Mercedes   1m14.807s  + 1.415	48
11.  Vitaly Petrov        Renault                1m14.856s  + 1.464	38
12.  Bruno Senna          Renault                1m14.931s  + 1.539	37
13.  Sergio Perez         Sauber-Ferrari         1m14.970s  + 1.578	32
14.  Kamui Kobayashi      Sauber-Ferrari         1m15.019s  + 1.627	45
15.  Sebastien Buemi      Toro Rosso-Ferrari     1m15.264s  + 1.872	44
16.  Jaime Alguersuari    Toro Rosso-Ferrari     1m15.388s  + 1.996	41
17.  Pastor Maldonado     Williams-Cosworth      1m15.679s  + 2.287	43
18.  Rubens Barrichello   Williams-Cosworth      1m15.903s  + 2.511	40
19.  Jarno Trulli         Lotus-Renault          1m16.298s  + 2.906	36
20.  Heikki Kovalainen    Lotus-Renault          1m16.338s  + 2.946	48
21.  Jerome D'Ambrosio    Virgin-Cosworth        1m18.031s  + 4.639	39
22.  Timo Glock           Virgin-Cosworth        1m18.051s  + 4.659	45
23.  Daniel Ricciardo     HRT-Cosworth           1m18.367s  + 4.975	42
24.  Tonio Liuzzi         HRT-Cosworth           1m18.476s  + 5.084	42